Menu

በወርቅ ፍለጋ ፕሮጀክት ላይ ጥቃት ተፈጸመ

በኦሮሚያ ክልል በምዕራብ ወለጋ ዞን ቱሉ ካፒ በተሰኘ ሥፍራ የሚገኘው ከፊ ሚኒራል በተባለ የእንግሊዝ ኩባንያ ሥር የሚተዳደረው የወርቅ ፍለጋ ፕሮጀክት፣ የጦር መሣሪያ በታጠቁ ግለሰቦች ጥቃት ደረሰበት፡፡

ኩባንያው ከአራት ዓመት በፊት የወርቅ ማዕድን ለማምረት ፈቃድ አግኝቶ ሲንቀሳቀስ እንደነበር ይታወቃል፡፡

ጥቃቱ የደረሰው እሑድ ግንቦት 18 ቀን 2011 ዓ.ም. ማለዳ ላይ መሆኑን፣ የከፊ ሚኒራልስ ዋና ሥራ አስፈጻሚ ሐሪ አዳምስ ለሪፖርተር ተናግረዋል፡፡ ጥቃት ፈጻሚዎቹ ከኩባንያው ሠራተኞች አብዛኞቹ ቤተ ክርስቲያን መሄዳቸውን ጠብቀው ወደ ኩባንያው ቅጥር ግቢ ገብተዋል ብለዋል፡፡

ጥቃት ፈጻሚዎቹ በፕሮጀክቱ ግቢ ውስጥ የተለያዩ የማዕድን ፍለጋ መሣሪያዎች ያሉበትን ቤት ማቃጠላቸውን፣ በውስጡም ያገኙትን የጂፒኤስ መሣሪያዎችና ማይክሮስኮፖች መዝረፋቸውን ገልጸዋል፡፡

በተጨማሪም የተለያዩ ቢሮዎች ውስጥ በመግባት የኩባንያው መገልገያ ዕቃዎችንና ፋይሎችን አተራምሰዋል ብለዋል፡፡ ‹‹ይህ ዓይነት ዘረፋና ንብረት ማውደም በአካባቢው ከዚህ ቀደም ተከስቶ ቢያውቅም፣ እኛ ላይ ሲፈጸም ግን የመጀመርያው ነው፤›› ሲሉ ዋና ሥራ አስፈጻሚው ተናግረዋል፡፡

በኩባንያው ሥር የሚገኘው የወርቅ ማምረቻ በዓመት እስከ 1.2 ሚሊዮን ቶን የወርቅ አፈር በማጣራት ከ2,650 እስከ 2,800 ኪሎ ግራም ወርቅ የማምረት አቅም ሲኖረው፣ በኦሮሚያ ክልል በምዕራብ ወለጋ ዞን ገንጂ ወረዳ ቱሉ ካፒ የሚገኘው የወርቅ ማውጫ ይዞታ ሰባት ካሬ ኪሎ ሜትር ስፋት አለው፡፡ ኩባንያው የወርቅ ማምረቻውን ለመገንባት 120 ሚሊዮን ዶላር ወጪ መድቦ ሲንቀሳቀስ እንደነበር ይታወሳል፡፡

‹‹የአሁኑ ጥቃት እኛንም ሆነ የአካባቢውን ማኅበረሰብ አስደንግጧል፤›› ያሉት ዋና ሥራ አስፈጻሚው፣ ‹‹በኩባንያችን ያለውን ጥበቃ ማጠናከር እንዳለብን ትምህርት ሰጥቶናል፤›› ብለዋል፡፡

ከጥቃቱ ጋር በተያያዘ የተጠረጠሩ የተወሰኑ ግለሰቦች መታሰራቸውን ለማወቅ ተችሏል፡፡

ጥቃት ፈጻሚዎቹ የፈለጉትን ካደረጉ በኋላ የኩባንያውን ሾፌር በማስገደድ፣ ከኩባንያው አሥር ኪሎ ሜትር ያህል ርቀው ይዘው መጓዛቸው ታውቋል፡፡

የኦሮሚያ ክልል ኮሙኒኬሽን ቢሮ ኃላፊ አቶ አድማሱ ዳምጠውን ለማግኘት የተደረገው ሙከራ አልተሳካም፡፡

ይህን የመሰለ ጥቃት በተለይ በምዕራብ ወለጋ ዞን ሲከሰት ሁለተኛው ሲሆን፣ ከወራት በፊት አምስት የወርቅ ማዕድን ፍለጋ ኩባንያ ሠራተኞች በታጣቂዎች በአሰቃቂ ሁኔታ መገደላቸው ይታወሳል፡፡ ከተገደሉትም ውስጥ አንድ የጃፓንና አንድ የህንድ ዜግነት ያላቸው ግለሰቦች እንደነበሩበት ይታወሳል፡፡

reporter

በወርቅ ፍለጋ ፕሮጀክት ላይ ጥቃት ተፈጸመ

بازی انفجار