የአማራና ቤኒሻንጉል ክልሎች የልማትና የሰላም ስምምነት ተፈራረሙ

አዲስ አበባ ፣ ነሃሴ 12 ፣ 2011 (ኤፍ ቢ ሲ) የአማራ እና የቤኒሻንጉል ጉሙዝ ክልሎች በጋራ ለመስራት የሚያስችላቸውን የልማትና የሰላም ስምምነት ተፈራረሙ።

የሁለቱ ክልሎች ርዕሰ መሥተዳድሮች እና የልዑክ አባላት ላለፉት ሁለት ቀናት በአሶሳ ከተማ በጋራ ሰላምና ልማት ላይ ሲያደርጉት የነበረው ውይይት በዛሬው እለት ተጠናቋል።

በመድረኩ ማጠቃለያ ላይም ሁለቱ ክልሎች የልማትና የሰላም ስምምነት ፊርማ ተፈራርመዋል።

የአማራ ክልል ርዕሰ መሥተዳድር አቶ ተመስገን ጥሩነህ ትናንት ታላቁ የኢትዮጵያ ህዳሴ ኤሌክትሪክ ኃይል ማመንጫ ግድብን የጎበኙ ሲሆን፥ አሶሳ ከተማ ከሚገኙ የአማራ ክልል ተወላጆች ጋር ተወያይተዋል።

በዚህም ትኩረት የሚሹ የፖለቲካ፣ የልማትና የሰላም ጥያቄዎች ቀርበው ውይይት ተደርጎባቸዋል።

በዛሬው እለትም ያለፈው በጀት ዓመት የክልሎቹ የጋራ የልማትና የሰላም ዕቅድ አፈጻጸምና የ2012 በጀት ዕቅድ ላይ መክረዋል።

በአስተዳደር ወሰን አካባቢዎች የሚኖሩ ሕዝቦች በሰላም እንዲኖሩ የተለያዩ ስራዎች ቢከናወኑም በነበረው የጸጥታ ችግር መፈናቀል፣ ሞትና የንብረት ውድመት መከሰቱም በዚህ ወቅት ተገምግሟል።

የጸጥታ ችግሮችን አስቀድሞ መለየትና መከላከል ባለመቻሉ ችግሮች መፈጠራቸውም ተነስቷል።

በሌላ በኩል የሁለቱም ክልሎች የሥራ ኃላፊዎች ችግሮቹን ለማስተካከል ያከናወኗቸው ተግባራት በጥንካሬ የተነሱ ሲሆን፥ የሕዝብ ለሕዝብ ትስስርን ለማጠናከር ውይይቶች ተካሂደዋል።

የተፈናቀሉ ዜጎችን ወደ ነበሩበት ለመመለስ የተጀመሩ ጥረቶችን አጠናክሮ መቀጠል እንደሚገባም በውይይቱ ወቅት ተገልጿል።

ከዚህ ባለፈም ህገ ወጥ የጦር መሳሪያ እና ኮንትሮባንድን በጋራ ለመከላከል አቅጣጫ መቀመጡን ከአማራ ብዙሃን መገናኛ ድርጅት ያገኘነው መረጃ ያመላክታል።


የአማራና ቤኒሻንጉል ክልሎች የልማትና የሰላም ስምምነት ተፈራረሙ