ጥሩ አማካሪ የሌለው መሪ (ግርማ ካሳ)

Satenaw: Ethiopian News & Breaking News: Your right to know!

ፕ/ሚ አብይ አማካሪ አድርጎ ከጎኑ የኮለኮላቸው ‘እሼ ጌታዬ” የሚሉ ሰዎችን፣ የስነ ልቦና ምሁራንን፣ ዲያቆናትን ነው፡፡ የፖለቲካ ስትራቲጂስቶች የሉትም፡፡ ቻሌንጅ ቲካ ስትራ አማካሪዎች የሉትም፡፡ ስለዚህ በሚያደርጋቸው ስራዎች እግሩ ላይ እየተኮሰ፣ ራሱን በራሱ ከጭዕዋታ ውጭ እያወጣ ወደ እየሄዴ ነው፡፡

ከዚህ በታች የባህር ዳር ዩኒቨርሲቲ መምህር የሆነች አንድ እህት የጻፈችውን እንደሚከተለው ላስነብባችሁ፡፡ እንደዚች አይነት እህት አማካሪ ቢኖሩት ኖሮ ይሄን ጊዜ ትሩ ነገ ሊመጣ ይችል ነበር፤፡

=================
ቤተመንግሥታቸውን ባሳደሱ ማግሥት፡ የፈረሰውን ቤተእግዚአብሔር መልሰው እንዲያሳንጹ ተጠየቁ፤ እምቢኝ አሉ! አለመታደል!

የዛሬውን የቅዱስ ሲኖዶስና የጠቅላዩን ውይይት ቃል በቃል የተከታተሉ ውስጠ-ዐዋቂዎች እንደነገሩን፡ ጠቅላዩ፡ በቤተክርስቲያን ላይ ስለደረሰው በደል፡ “ይቅርታ አልጠይቅም፤ ቤተ ክርስቲያንም አልሠራም” ብለዋል።
ክቡር ጠቅላይ ሚኒስቴር፡……ማ ተጎዳ?!!

ሲጀመር፡ ቤተክርስቲያን ለመሥራት፡ ሰው እግዚአብሔርን ደጅ ይጠናል እንጂ፡ እግዚአብሔር፡ የተቃጠለ ቤተክርስቲያን ምክንያት አድርጎ፡ በካህናት አንደበት የተገላቢጦሽ ሰውን ደጅ ሊጠናው ይገባ ነበር ወይ?!

ላለፉት 2000 ዓመታት፡ ከኢትዮጵያ ነገሥታትና ንግሥታት፣ መሳፍንትና መኳንንት፣ ልዑላንና ልዕልታት፣ ባለጠጎችና መናኞች፣ ባላባቶችና ባለርስቶች መካከል፡ ዕድሉ እንዲገጥመው ለእግዚአብሔር ተስሎ፡ ቤተ ክርስቲያን ያላነጸ መሪ ማንም የለም። ስሙ ከአምላክ ስም ጋር በመቅደሱ ዐብሮ እንዲታወስ ያልለመነ አስተዳዳሪ በኢትዮጵያ ምድር አልተፈጠረም። በዘመነ ኦሪት የነበሩትም ነገሥታት፡ የኦሪት መሰዊያ ከማሥሰራት ወደኋላ ያሉበት ጊዜ የለም። ከነርሱ ቀድሞ፡ ከሦስት ሺህ ዓመት በፊት፡ በአበው ዘመን፡ ከአዳም ጀምሮ የተሰጠው ሀብተ ክህነትና ሀብተ መንግሥት በረከት ተካፋይ ለመኾን የፈለጉ መሪዎች ኹሉ፡ በመላ የኢትዮጵያ ተራሮች ላይ መሰዊያዎችን በመሥራት ነው፡ ዘመነ መንግሥታቸውን የጀመሩት። በዕብራውያን መሥመር፡ የዚህ ትውፊት አስቀጣዮች የኾኑት አብርሃም፥ ይስኃቅ፥ ያዕቆብና ልጆቹም፡ በየደረሱበት የመጀመሪያ ሥራቸው፡ ለእግዚአብሔር መሰዊያ መሥራትና መስዋዕት ማቅረብ ነበር። በሐዲስ ኪዳንም፡ ቤተክርስቲያን በቂ ምዕመናን ካገኘች በኋላ፡ በየትኛውም የዓለማችን ክፍል የተነሱ ነገሥታት ኹሉ የተመዘኑት፡ ለሐዲስ ኪዳን መሥዋዕት ማቅረቢያ በመገንባታቸውና ያንንም በአግባቡ እንዲተዳደር በማድረግ ወይም ባለማድረጋቸው ነው።
ይኽን ሥርዓትና ሃይማኖታዊ ምግባር በመከተል፡ ዛሬም፡ ሀብት፣ ወይም የማስተባበር ጥበብ አግኝተው ቤተክርስቲያን ለማስተከልና ስመ እግዚአብሔር በየትውልዱ እንዲጠራ ለማስደረግ፥ በዚያም ዘለዓለማዊ በረከት ለማግኘት እግዚአብሔር ዕድሉን እንዲሰጣቸው እየተማጸኑ የሚኖሩ ምዕመናን እጅግ ብዙ ናቸው። የመጨረሻ ድኃ የተባለው እንኳ፡ ለእግዚአብሔር ቤት ማስሠሪያ ከተጠየቀ፡ የሚሰጠው አጥቶ አያውቅም።

ይኽ ለ7500 ዓመታት በኢትዮጵያ የቀጠለው ትውፊት ነው እንግዲህ፡ ዛሬ፡ ጠቅላዩን “በአፍንጫቸው ሥር” ያለፋቸው። እርሳቸው በራሳቸው ተነሳሽነት ቤተ ክርስቲያን ለመትከል ጥያቄ የማያቀርቡ ቢኾን፡ እግዚአብሔር የፖለቲካውን ማዕበል ተጠቅሞ ፈተናቸው። ወደቁ!! ተ-ፈ-ጠ-ፈ-ጡ!! አበስኩ ገበርኩ!

በኢትዮጵያ ታሪክ፡ “የቤተክርስቲያን ወዳጅ ነኝ” ብሎ፡ “ንጉሥ ሆይ ምን ነካህ? ቤተክርስቲያን ሥራ እንጂ!?” ተብሎ እስኪጠየቅ የጠበቀ መሪ የለም። እንደነመንግሥቱና መለስ ዜናዊ ሃይማኖት የለሽ ቢጤ ከኾነ ደግሞ፡ ጥያቄው ሲጀመርም አይቀርብለትም። ዶ/ር ዐቢይ ግን፡ በገዛ እጅ” የቤተክርስቲያን ወዳጅ ነኝ” ብለው ራሳቸውን ካቀረቡ በኋላ፡ በተግባር እንዲያሳዩ እግዚአብሔር ጠይቆ ቢፈትናቸው፡ ዛሬ “ወግድልኝ” ብለውታል።

ዐቢቹ?! ምን ነካዎት?! ቤተክርስቲያን ለመሥራት እኮ የግድ ካህን እስኪገድሉ መጠበቅ የለቦትም?! እንደሥርዓቱማ፡ እንደቅዱስ ዳዊት እግዚአብሔርን ለምነው፥ ነቢያት ካህናትን ደጅ ጠንተው፥ “የአምላክን ቤት ልሠራ ተፈቅዶልኛል ወይ” ብለው ሊጠይቁ ይገባዎት ነበር። “የእግዚአብሔር ወዳጅ ነኝ” የሚል ኹሉ የሚቀርብለት ፈተና ለእግዚአብሔር መሰዊያ መሥራት ነው፤ ጥንት ለሚቃጠል መስዋዕት፥ ዛሬ ደግሞ ለሐዲስ ኪዳን መስዋዕት።

ከዚህ ውጭ ታድያ ከቤተክርስቲያን ጋር ተባብረው ሊሠሩ የሚያስቡት ሥራ ምንድነበር? ኮብል ስቶን? አይ ሥርዓተ መንግሥት አለማወቅ!

ማሳደሱንስ ቤተመንግሥትዎን አሳደሱ፤ የእግዚአብሔር ቤትስ!? ዳዊት እርሱ ባማረ ቤተመንግሥት ተቀምጦ የእግዚአብሔር ታቦት በድንኳን መንከራተቷ እጅግ ይከነክነው ነበር። ንጉሥ ማለት እንዲህ ነው። እግዚአብሔር ሰማይ ዙፋኑ፥ ምድርም የእግሩ መረገጫ ሲኾን፡ ሊፈትነን ግን በመካከላችን በሚገኘው ቤቱ ይመጣብናል። ታሪከ ነገሥትን፥ መጽሓፈ ነገሥትን፣ ክብረ ነገሥትን፣ ፍትሓ ነገሥትን… ወዘተ እያነበቡ ቢያድጉ ኖሮ የዛሬውን ፈተና ያልፉት ነበር። ማኪያቬሊን ሲያነብቡ ስለኖሩ ተፈጥፍጠውታል!

ከአገልግሎት መስጫ ክልል ውጪ ኾነው ወድቀዋል!
ፕሮቴስታንት ቢኾኑም የፈተናው ጥያቄ ከዘመን ዘመን አንድ ዓይነት ነው! የኢትዮጵያ ሥርዓተ መንግሥት ዘለዓለማዊ፣ ያዕቆባዊት፣ መልከጼዴቃዊት ሥርዓት ነች። ያገኘችውን ኹሉ እንደልቧ ትፈትነዋለች፥ ማንነቱን ትገልጥበታለችም! ፌዴራሊዝም ቢሏት ዲሞክራሲ፥ ካፒታሊዝም ቢሏት ቴክኖክራሲ፡ እሷ እቴ፥ ግድ የላትም!

በመጽሐፍ ቅዱስ፡ እያንዳንዱ የእሥራኤል ንጉሥና መስፍን፡ ታሪኩ ሲጻፍ፡ ልቡ ከእግዚአብሔር ጋር እንዴት እንደነበረና ቤተ መቅደስና መሰዊያዎችን አስመልክቶ ምን ዓይነት አቋም እንደወሰደ ትኩረት ተሰጥቶት ተጽፏል- በመንፈስ ቅዱስ መሪነት።

ስለዚህ፡ ታሪክ ፀሓፊዎች፡ ስለዐቢይ ሲጽፉ፡ ዓለም ከተፈጠረ ጀምሮ በኢትዮጵያ ከተነሱ መሪዎች፡ ቤተ-እግዚአብሔርን እንዲሠሩ፡ ባልተለመደ መልኩ፡ በአባቶች ጥያቄ ቀርቦላቸው “እምቢኝ” ያሉ የመጀመሪያው መሪ እንደኾኑ መጥቀስ ይኖርባቸዋል። በእግዚአብሔር ፊት የዶ/ር ዐቢይ ቋሚና ዘለዓለማዊ ማንነት ይኼ ነው።
አለመታደል ነው!

The post ጥሩ አማካሪ የሌለው መሪ (ግርማ ካሳ) appeared first on ሳተናው: Satenaw: Ethiopian News/Breaking News: Your right to know!.


ጥሩ አማካሪ የሌለው መሪ (ግርማ ካሳ)