በባንኮች መካከል አላስፈላጊ ውድድር እንዳይኖር የምጣኔ ሀብት ባለሙያዎች አሳሰቡ፡፡

አባይ ሚዲያ ( መስከረም 27 ፣ 2012 ) እየጨመረ የመጣውን የባንኮች ቁጥር ተከትሎ በመካከላቸው ተገቢ ያልሆነ ውድድር እንዳይፈጠር ጥንቃቄ ማድረግ እንደሚገባ የምጣኔ ሀብት ባለሙያዎች አስገነዘቡ፡፡ የአዲስ አበባ ዩኒቨርሲቲ በቢዝነስና ኢኮኖሚክስ ፋክልቲ መምህርና የሂጅራ ባንክ ፕሮጀክት አደራጅ ምክትል ሰብሳቢ አቶ ሙከሚል በድሩ እንደገለጹት ‹‹የባንኮች ቁጥር እየጨመረ በመጣ ቁጥር ውድድሩም አብሮ እያየለ ይመጣል ያሉ ሲሆን ውድድሩ አላስፈላጊ እየሆነ እንደሚመጣ ጠቅሰው በዚህ የተነሳም የተበላሸ ብድር እንዲበዛ የብድር ማስያዣዎች የሚገመቱበት መንገድና የፕሮጀክቶች አዋጭነት ጥናት በማካሄድ ረገድ ሊያደርጉ የሚገባቸውን ጥንቃቄ ሊቀንሰው እንደሚችልም ጠቁመዋል፡፡ ባንኮቹ በተበራከቱ ቁጥር አሁን ካለው በበለጠ የባለሙያዎች መቀማማት እንደሚፈጥር ያስገነዘቡት አቶ ሙከሚል ይህም አንዳንድ ባንኮችን ሊያዳክምና ሊጎዳ የሚችልበት ሁኔታ እንደሚኖርም አስገንዝበዋል፡፡ የአንደኛውን ባንክ መረጃ ወደ ሌላኛው የመስጠት አዝማሚያ ሊፈጠርና በዘርፉ ላይ ጤናማ ያልሆነ ከባቢ እንዲፈጠር እንደሚያደርግም አቶ ሙከሚል አክለው ገልጸዋል፡፡

የአዲስ አበባ ዩኒቨርሲቲ የኢኮኖሚክስ መምህር ረዳት ፕሮፌሰር ብርሃኑ ደኑ ባንኮች የኢኮኖሚው ዋነኛ ዘዋሪና ጤናማነት መሠረት መሆናቸውን ጠቅሰው ከሌሎቹ አገልግሎቶችም በላይ ዘርፉ ከፍተኛ ጥንቃቄ ሊደረግበት እንደሚገባ አስገንዝበዋል፡፡ ረዳት ፕሮፌሰር ብርሃኑ የአቶ ሙከሚልን ሀሳብ በማጠናከር የባንኮች ቁጥር ሲጨምር በመካከላቸው ተገቢ ያልሆነ ፉክክር ሊፈጠር የሚችልበት ዕድል ሊኖር እንደሚችል ጠቁመዋል፡፡ ደንበኛ ለመሳብ ወይም ተበዳሪ ለማግኘት ከተለመደው ውጪ በዝቅተኛ የዋስትና መያዣ ከፍተኛ ገንዘብ መስጠት ይኖራል ያሉት ረዳት ፕሮፌሰሩ ይህ ዓይነቱ አሠራር ደግሞ ኪሳራው ከፍተኛ ስለመሆኑ አብራርተዋል፡፡ በዚህ ዓይነት ያልተገባ አካሄድም በርካታና ግዙፍ ባንኮች በአጭር ጊዜ ኪሳራ ላይ መውደቃቸውንና ከገበያ መውጣታቸውን  ረዳት ፕሮፌሰሩ አውስተዋል፡፡


በባንኮች መካከል አላስፈላጊ ውድድር እንዳይኖር የምጣኔ ሀብት ባለሙያዎች አሳሰቡ፡፡