ኢትዮጵያ ለምትገነባቸው የባቡር መንገድ ዝርጋታዎች ብቁ ባለሙያዎችን እንዳፈራች ተገለጸ፡፡

አባይ ሚዲያ (ጥቅምት 2 ፤ 2012) የምድር ባቡር መሃንዲሱ ጥበቡ ጳውሎስ እንደተናገሩት በድልድይ ሥራ፣ በሀዲድ ንጣፍና በዋሻ ውስጥ መንገዶች ትኩረት ያደረገ ሥራ እንደሚያከናውኑና ፕሮጀክቱም በአውሮፓ የጥራት ደረጃ እየተሰራ መሆኑን አስረድተዋል፡፡

እንደ መሃንዲሱ ገለፃ ዓለም አቀፍ እውቅና ካላቸው ባለሙያዎች ከቴክኖሎጂ ሽግግር ባለፈ በሰዓትና በሰው ሃይል አጠቃቀም ላይ ትልቅ ትምህርት እንዳገኙና ኢትዮጵያ በቀጣይ ለምታስገነባቸው የባቡር ፕሮጀክቶች እኛ በቂዎች ነን ሲሉ ተናግረዋል፡፡

ከአዋሽ – ኮምቦልቻ – ሃራ ገበያ በሚዘረጋው የባቡር መስመር የግንባታ ሥራ በርካታ የውጭ ሀገራትና ኢትዮጵያውያን ባለሙያዎች እየተሳተፉ ሲሆን  መሃንዲሶቹ ፕሮጀክቱ የቴክኖሎጂ ሽግግር እንደተደረገበት ተናግረዋል።

በባቡር ኤሌክትሪካል ምህንድስና ዘርፍ ኢትዮጵያውያኑ ባገኙት ልምድና እውቀት ወደ ፊት ሀገሪቱ ለውጭ ባለሙያዎች የምታወጣውን ወጪ መቀነስ እንደምትችል የገለፁት በፕሮጀክቱ የተሰሩና እየተሰሩ ያሉ የኤሌክትሪክ ሃይል ማሰራጫዎችን የሚከታተሉት በኢትዮጵያ ምድር ባቡር ኮርፖሬሽን የባቡር ኤሌክትሪካል መሃንዲስ ዮሴፍ በቀለ ናቸው፡፡

በኢትዮጵያ ምድር ባቡር ኮርፖሬሽን የአዋሽ – ኮምቦልቻ – ሃራ ገበያ ፕሮጀክት የሴክሽን ፕሮጀክት ሥራ አስኪያጅ ኢንጂነር ሻሎም አሽሮ ፕሮጄክቱ አዲስ እንደመሆኑ ከፍተኛ ባለሙያዎች ከቱርክ፣ ከፈረንሳይ፣ ከፖርቹጋልና ከሌሎችም የአውሮፓ ሀገራት የመጡ በመሆናቸው ለሀገሪቱ መሃንዲሶች መልካም አጋጣሚ እንደሆነም አስረድተዋል፡፡

ለቀጣይ ሥራዎች ጥሩ እውቀት ተይዟል ያሉት ኢንጂነሩ የሀገሪቱ ባለሙያዎች ከቴክኖሎጂ ጋር የመተዋወቅና ራሳቸውን የማብቃት ዕድል እንዳገኙም ነው ያስረዱት፡፡ በባቡር ፕሮጀክት ቀጥተኛ ግንኙነት ያላቸው ተማሪዎች እንዳሉና በቀጣይ ሀገሪቱ ከውጭ የምታስመጣቸውን ባለሙያዎች የመተካት አቅም እየዳበረ እንደሆነም ኢንጂነር ሻሎም ተናግረዋል፡፡

ኢትዮጵያ በቀጣይ ለምትገነባቸው የባቡር መንገድ ዝርጋታዎች ብቁ ባለሙያዎችን እያፈራች መሆኗንም በዘርፉ የተሰማሩ ባለሙያዎች ተናግረዋል፡፡


ኢትዮጵያ ለምትገነባቸው የባቡር መንገድ ዝርጋታዎች ብቁ ባለሙያዎችን እንዳፈራች ተገለጸ፡፡