በአብን ውስጥ የአመራር ክፍፍል አለ መባሉን አቶ በለጠ ሞላ አስተባበሉ፡፡

አባይ ሚዲያ የካቲት 16፤2012

የአማራ ብሔራዊ ንቅናቄ በደብረ ብርሃን ከተማ አንደኛ አስቸኳይ ጠቅላላ ጉባዔውን ቅዳሜ እና እሁድ ካካሄደ በኋላ አዳዲስ አመራሮችን መርጧል በዚህም መሠረት ጠቅላላ ጉባዔው ፓርቲውን ከምስረታው ጀምሮ በሊቀ መንበርነት ሲመሩት የቆዩትን ዶ/ር ደሳለኝ ጫኔን  አንስቶ በምትካቸው ምክትላቸው የነበሩትን አቶ በለጠ ሞላን ሊቀ መንበር አድርጎ የመረጠ ሲሆን፤ አቶ ዩሱፍ ኢብራሂምን ደግሞ ምክትል ሊቀ መንበር አድርጎ ሾሟል።

ከቢቢሲ ጋር አጠር ያለ ቆይታ ያደረጉት አዲሱ ሊቀ መንበር አቶ በለጠ ሞላ፣ በወርሃ ነሐሴ ይካሄዳል ተብሎ ከሚጠበው አጠቃላይ ምርጫ ጋር በተገናኘ ፓርቲው የበለጠ ዝግጅት ለማድረግ ያግዘዋል ተብሎ ስለታሰበ የተካሄደ የአመራር ለውጥ ነው ብለዋል።

“የተለየ ምክንያት የለውም፤ አስቸኳይ ጉባዔ ተጠርቶ ስብሰባ አድርገን ምርጫ እየመጣ ስለሆነ እስከዛሬ ከነበረን ዝግጁነት በላቀ ተዘጋጅተን ለመጠበቅ ፍላጎት ስለነበረን ከዚሁ አንፃር የተቃኘ ነው” በማለት አቶ በለጠ የአመራር ለውጥ ማድረግ ያስፈለገበትን ምክያት ያስረዳሉ።

አቶ በለጠ የቀድሞውን ሊቀ መንበር ዶ/ር ደሳለኝ ጫኔን  “ጠንካራ መሪያችን ነበር” ሲሉ የገለጿቸው ሲሆን፤ የቀድሞ ሊቀ መንበር ወደፊት በፓርቲው ውስጥ ስለሚኖራቸው ሚና አስመልክቶ “አሁንም ከኋላ ሆኖ ሐሳብ በመስጠት፣ በአማካሪነት እና የማዕከላዊ ኮሚቴ አባል ሆኖ ይቀጥላል” ብለዋል አቶ በለጠ የአመራር ለውጡን በማስመልከት “ሰላማዊ ሽግግር ነው ያደረግነው  በእርሱ ጥቆማም ነው ይህ ሽግሽግ የተካሄደው” ብለዋል።

በማኅበራዊ የመገናኛ ብዙሃን ላይ በፓርቲው አመራሮች ዘንድ ክፍፍል ስለመኖሩ አስተያየቶች መኖራቸውን የገለፁት አዲሱ የአማራ ብሄራዊ ንቅናቄ ሊቀ መንበር፤ አስተያየቶቹን ፍሬ የላቸውም ሲሉ ያጣጥሏቸዋል።

“ጥሩ መንፈስ ላይ ያለ ፓርቲ ነው። ለመጪውም ምርጫ ሰፊ ዝግጅት እያካሄደ ነው። ከዚህ ውጭ ማኅበራዊ ሚዲያ ላይ የሚናፈሱ ወሬዎች ምንጫቸው ከየት አንደሆነ አናውቅም” ብለዋል።

ፓርቲው ጠንካራ ሆኖ እንዳይወጣ የሚፈልጉ አካላት የሚያደርጉት ዘመቻ አካል ነው ሲሉም ጠንከር ብለው ተችተዋል።

አብን በተጨማሪም  ከሰኔ 15ቱ የከፍተኛ የመንግሥት እና የመከላከያ ባለስልጣናት ግድያ ጋር በተገናኘ በእስር ላይ የሚገኙትን አቶ ክርስቲያን ታደለን የሥራ አስፈጻሚ አባል እና የፖለቲካ ጉዳዮች ኃላፊ አድርጎ መርጧል።


በአብን ውስጥ የአመራር ክፍፍል አለ መባሉን አቶ በለጠ ሞላ አስተባበሉ፡፡